EIDE, Asociacion de Diseñadores de Euskadi

Martxoaren 14an gure Batzar Nagusia egin genuen. Hor 2024ko jarduera errepasatu, 2025eko aurrekontuak onartu eta datozen bi urteetarako lan-ildoak partekatu genituen. Ekitaldi hori osatzeko ekonomia sortzaile zirkularrari buruzko topaketa irekia egin genuen Ternua Group eta Mondragon Unibertsitatearekin batera.

2022an eta 2023an bezala, gure bazkide korporatibo baten laguntza izan genuen horretarako. Oraingo honetan Mondragon Goi Eskola Politeknikoa izan zen anfitrioi lanak egin zituena eta GARAIA Parke Teknologikoko auditorioan hartu gintuen. Nekane Errastik, MGEPeko koordinatzaile akademikoak, bere hasierako hitzaldian adierazi zuen bezala, aukera bat harremanak estutzeko eta sektorea bultzatzeko ahalegin komunari balioa emateko.

Batzarrean, Benicio Aguerrea gure koordinatzaile gerenteak gidatuta, ohiko gaiak jorratu ziren — jarduera, altak/bajak, balantzea eta aurrekontuak —, eta Angélica Barco gure lehendakariaren hitzekin osatu ziren, zeinak lan ardatzak, helburuak eta 2025etik 2027ra bitarteko ekintza plana partekatu baitzituen. Hona hemen esku-hartze horren zenbait alderdi nabarmen:

• Bazkide kopuruaren hazkundea, egungo 106ra iritsi arte; horietatik 38 diseinu-enpresa gisa agertzen dira, 57 profesional gisa eta 11 bazkide korporatibo gisa.
• Benetako ekosistema bat eraikitzeko diseinuak Euskadin eta Nafarroan izan duen bilakaera. Ekosistema horretan, EIDE nodo konektore eta ordezkari sektorial gisa onartua da.
• Datozen bi urteetarako EIDEren ekintza-plana ezagutza (diseinuaren kultura), aintzatespena (jardunbide egokiak) eta loturak (sareak, aliantzak) bultzatzeko.

Bazkideentzako atal esklusibo honen amaieran, Erik Zarragak eta Kike Garciak (Banila Studio) EIDEren laster prest egongo den webgune berrian egindako aurrerapenak aurkeztu zituzten.

DISEINUARI ETA ZIRKULARTASUNARI BURUZKO TOPAKETA IREKIA

Jardunaldiaren bigarren atalan, ikasleek, profesionalek eta diseinuaren ekosistemako beste eragile batzuek bat egin zuten, eta Edu Uribesalgo Ternua Groupeko berrikuntza- eta jasangarritasun-zuzendariaren hitzaldiarekin hasi zen. Bertan, 1986an Arrasaten kirol-denda gisa sortu zen enpresa horren ibilbidea errepasatu zuen, eboluzionatuz joan dena ingurumen-, gizarte- eta ekonomia-ongizatearekiko konpromiso sendoarekin, 2024an B-Corp ziurtagiria lortu arte. Bide horretan diseinuak berebiziko garrantzia izan du, batez ere berrikuntza teknologiko iraunkorrera bideratutako I+G+b sail propio bat sortu zenetik. Bertan, proiektu bereziak garatu dituzte, hala nola, itsas sareetatik eta hondakinetatik abiatuta ehunak egitea, intxaurrek bezalako hondakin organikoetatik abiatuta tindaketa naturalak bilatzea, edo ardi latxaren artiletik abiatuta isolatzaile termiko bat garatzea.

Ondoren, Lander Balzak, EIDEko proiektuen koordinatzaileak eta ekitaldiaren bigarren zati honen gidariak, elkartea iraunkortasunaren arloan diseinuaren eta kultura- eta sormen-sektoreen multzoa bultzatzeko jokatzen ari den papera azaldu zuen. Garrantzi berezia emanez hondakinen prebentzioari eta kudeaketari, Waste Lab Bizkaiaren esparruan, Garbikerrek sustatutako proiektua EIDErekin eta Aclimarekin lankidetzan.

Bere hitzaldian, Lander Balzak elkarteak egindako bi lan zehatz partekatu zituen, «Nola lagun dezakete KSIek hondakinen metaketaren problematika konpontzen?» galderari erantzun nahi diotenak:

• «Hondakinen balorizazio sortzailea» txostena. Bertan, ikerketa arduratsu baten ondoren, birziklatzeari eta «supraziklajeari» buruzko 130 erreferentzia inguru jasotzen dira, tokian tokikoak, nazionalak eta nazioartekoak, jatorrizko materialaren arabera sailkatuta.
•  «Hondakinetatik altxorretara» bideoa, “garbiguneei” buruzko hausnarketa- eta esperimentazio-prozesu bat erakusten duena, iraunkortasunarekin lotutako KSIetako profesionalekin (Alegre Biribilketa) egindakoa.

Bideoaren proiekzioaren ondoren, Ekonomia Sortzaile Zirkularrari buruzko mahai-inguru bat osatu zen, eta bertan parte hartu zuten proiektuaren talde sustatzaileko hiru kidek — Brigitte Sauvage, Leire García (ColaBoraBora) eta Jon Abad (Abad Design) —, Edu Uribesalgok eta Ganix Lasa Mondragon Unibertsitateko irakasle ikertzaileak.

Mahai horretan, esparru profesionalaren, enpresarial-industrialaren eta akademikoaren ikuspegiak trukatu ziren, sormena eta iraunkortasuna arazo global eta konplexu baterako irtenbide berrien bilaketan integratzeko orduan. Interes handiko eztabaida horretan, bertaratutako jendeak ere parte hartu zuen, eta hainbat gai sortu ziren, hala nola gure jardueraren eragina kuantifikatzeko zailtasuna edo industria-eskalan egiten ari den lana osatzeko ekimen txiki askoren artean ahaleginak batzeko beharra.

Jardunaldia Ganix Lasak itxi zuen. Hirekin, Mondragon Unibertsitateak bultzatutako eraldaketa jasangarrirako berrikuntza eta ekintzailetza zentro berriari buruz hitz egin zuen, eta unibertsitatean egiten den ikerketari buruzko gako batzuk partekatu zituen, bereziki Diseinu Berrikuntza Zentrotik, eskola politeknikoaren diseinu sailetik.

Nuria Gonzalezek grafikoki dokumentatu zuen jardunaldia (hemen ateratako argazkiak), eta Onda Vascak eman zuen jardunaldiaren berri, Kike Alvarezek bere magazinean egindako elkarrizketa honen bidez.